Munisipale rekeninge Chaos

Die Tshwane-metroraad het tydens ‘n raadsvergadering dié week ‘n mosie aanvaar vir ‘n moratorium op die afsny van water en ligte sodra ‘n dispuut tussen ‘n inwoner en die munisipaliteit rakende diensterekeninge ontstaan.

DA-Raadslid Janho Engelbrecht, wat die mosie voorgestel het, sê dit sal duisende inwoners help wat met die afsny van krag gedreig word ten spyte van getroue betalings op hul rekeninge. “Die mosie plaas ‘n moratorium op die afsny van water en ligte, op voorwaarde dat die geaffekteerde inwoner steeds minimum betalings maak gebaseer op die gemiddelde maandelikse munisipale rekening wat die inwoner in die laaste drie maande, voor die dispuut met die munisipaliteit, ontvang het.

Engelbrecht sê ‘n DA ondersoek het ook aan die lig gebring dat die munisipaliteit nie ‘n gepromulgeerde skuldinvorderingsbeleid in plek het nie. Dit is in teenstelling met die bepalinge van die Wet op Munisipale Sisteme, wat vereis dat ‘n munisipaliteit beide ‘n kredietbeheer- en skuldinvorderingsbeleid implementeer.

“Dít beteken dat die munisipale owerheid ongewettig optree teenoor sy kliënte. Dit is ons verantwoordelikheid om hierdie situasie reg te stel en seker te maak dat amptenare binne die wet optree,” het Engelbrecht gesê.

Die DA bied sy hulp aan inwoners wat ‘n dispuut in terme van hul munisipale diensterekening wil verklaar. Inwoners moet die volgende doen:

Skryf ‘n brief waarin ‘n dispuut met die munisipaliteit rakende uitstaande geld verklaar word. Inwoners moet hul naam, woonadres, munisipale rekeningnommer en ‘n kontaknommer voorsien.
Die aard en omvang van die dispuut moet duidelik wees.
Inwoners moet ook die gemiddelde bedrag van die laaste drie maande se rekeninge bereken, en dié bedrag maandeliks aan die munisipaliteit betaal totdat die dispuut uitgeklaar is.
Die getekende brief moet na die DA se koukuskantoor in Munitoria (faks no 012 358 7808) gefaks en vir die Munisipale Bestuurder se aandag gemerk word. Inwoners sal skriftelik in kennis gestel word dat hul briewe ontvang is