Brief gerig aan APS(Aksie Pretoria Straatname)

Geagte Vriende,

Neem asseblief kennis dat die Demokratiese Alliansie van Aksie Pretoria Straatname ontrek.

Ons wil ons dank uitspreek teenoor organisasies soos Afriforum en Solidariteit vir hul harde werk in die bevordering van die Afrikaner saak en wil hul verseker van ons voortgesette goeie verhoudinge en ondersteuning.

Verstaan asseblief dat die Demokratiese Alliansie nie deel van hierdie groep kan bly terwyl sekere individue hierdie belangrike proses misbruik vir kortsigtige politieke gewin nie. Dit is ons mening dat selfgerigte politieke opportunisme die saak kan laat verongeluk en daarom wil ons geen aandeel daarin he nie. Die Demokratiese Alliansie is 'n party wat glo in die oppergesag van die reg en in menswaardigheid, ons kan ons self nie langer assosieer met mense wat nie hierdie waardes deel nie.

Wees verseker dat die Demokratiese Alliansie sal voortgaan met ons pogings om die proses te stop en dat ons sal aanhou veg vir die regte van ons kiessers om sodoende 'n beter Suid-Afrika vir almal te verseker.

Rakende die gebeure tot dusver: Dit is my mening dat enige persoon met 'n gesonde verstand behoort te weet dat dit absolute onnoselheid is om die straatnaamkwessie te probeer beveg op die argument van terroriste, moordenaars en ander, uiters rassistiese opmerkings. Dit is die een gewaarborgte manier hoe 'n mens nie iets gaan regkry nie, en juis die teenoorgestelde sal bereik. Die ANC het 'n groot meerderheid in die Raad, om die proses deur emosionele rasgedrewe konfrontasiepolitie k te benader, eerder as onderhandelinge, is onwys. Dit sal daartoe lui dat ons nie ons doel sal bereik nie.

Groete en sterkte

Janho Engelbrecht

Tshwane metro Raadslid (DA)